Гомер-корама

Корамалы-корамалы

Гомер юлым җәймәләре.

Аклы-күкле фасыллары,

Аллы-гөлле җәйләүләре.

Бер – тыйнагы, бер – җетесе:

Тотам-тотам үрнәкләре.

Бар тоташтан бертөрлесе,

Бар затлысы – сирәкләре.

Әниемнең җитез кулы

Теккән җөйләр сүтелмәгән;

Чәчәкләре – сабый гөлләр –

Челләләрдә өтелмәгән.

Күзнең явын алып тора

Яшьлегемнең балкышлары:

Саф фирүзә – күк-чатыры,

Каурый болыт – аккошлары.

...Төсен җуйган – тоныкланган

Урыны белән бизәкләре.

Ялгау-ялгау ялгышларым

Өзеп ала үзәкләрне.
Кул астымда булмагандыр

Кайчак якты өлгеләре.

Корамамда караңгы төс –

Ашыгычлык билгеләре.

Җөйләре дә салулаган,

Чияләнгән җепләре дә...

Гел-гел тәңгәл килмәгәндер

Язмышымның җекләре дә.

Күчкәнгәдер мирас булып

Әти-әни хәстәрлеге,

Таркалмаган, сүтелмәгән,

Бәз тукыма астарлыгы.

Терким әле гомеремне

Һаман шул бер корамага,

Ирешкәнче Аллаһымның

«Тәмам!» дигән карамагы.

Сайлап куйган өлгеләрем

Җитү түгел, артып китәр!

Шөкер, нәсел дәвамым бар

Корамамны мирас итәр. 

 Каләмдәшебез бүген үзенең юбилеен билгеләп үтә. Аңа исәнлек-саулык, иҗат уңышлары телибез.
 

 

"КУ" 04,2022

Фото: pixabay

Теги: поэзия

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: