Чакрым белән түгел, вакыт белән...

Чакрым белән түгел, вакыт белән

Үлчәнәләр хәзер аралар.

Бер сәгатьтән кайтып җитәм, диеп,

Йөз чакрымнан хәбәр салалар.

Бер белән йөз – җир белән күк иде

Кайчан гына әле, кайчан гына.

Атлар корыч, кошлар көмеш бүген,

Тизлекләрдән мәгәр аң чагыла.      

Бер белән йөз шундый якын инде...

Ераклаша күздән күзләр генә.

Кәрәз-чытырманда адашкандай,

Колакларны ярып бәргәләнә

Күзгә карап әйтер сүзләр генә...

Һәм... йөрәккә җитми өзеләләр,

Тезеләләр кыска гудок булып...

Тизлекләрдән җан ялыккан заман,

Кошлар – көмеш, юллар – асфальт,

Атлар – корыч... 

"КУ" 08, 2022

Фото: unsplash