Безнең җыр

«Күктән иңгән моңдыр!» – диештеләр:

Искән җилләр хәтта тын калды.

Толымнарың белән уйный-уйный

Ак болытка алар юл алды.

Серле җыр дип кабул итте йөрәк:

Зәңгәр күкләр чумган ал нурга.

Ромашкалы ак күлмәгең төсе

Күчкән иде безнең «ак җырга».

Җылы нурлар иркәләгән таңда,

Без бәхетле идек, билгеле...

Таң чыклары белән бергә әллә

Саф мәхәббәт үзе килдеме?

...Уйлар дәрьясында йөзгән чагым,

Моңлы бер җыр китми колактан.

Икәү язган, икәү ятлаган җыр...

Ишетелә ерак-ерактан!

"КУ" 9, 2019

фото: pixabay

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: