Безнең гомер

Көзләр килә инде, көзләр килә,

Елак яңгырларга ияреп.

Безнең гомер бары бер җәй генә,

Бары бер җыр гына диярлек.

Безнең гомер – бары бер җыр гына.

Каян табыйк матур сүзләрен?

Үткәннәрне якты моңга чорнап,

Каршы алыйк гомер көзләрен.

Саф сөюләр, матур хатирәләр

Үрелсеннәр гомер җырына.

Зар-моң белән җырны ямьсезләмик,

Кайгы-хәсрәт кушмыйк моңына.

Безнең гомер бары бер җәй генә,

Һәр мизгеле – үзе бер гомер.

Матурлыкка гашыйк безнең күңел,

Яшәп туймас идек барыбер. 

"КУ" 08, 2021

Фото: pixabay