Барлыгымны беләм. Барлыгымда.

Барлыгымны беләм. Барлыгымда –

Булмышымда әрем чәчкә ата.

Йолдыз тынын күмеп, таңнар ата,

Карлыгачлар оясына кайта.

Җил тузына, төссез тузаннарны

Кыек өсләреннән куар булып.

Күк имәнеп яңгыр җебен суза

Кара җиргә, үксеп елар булып.

Булмышымда – җирге тормышымда

Зәңгәр пәрдәләрдә көн чайкала.

Таш юлларга аяк терәп, төнгә керә,

Өр-яңадан төсен җуеп һәрбер кала.

Минем булмышымда-сулышымда

Өермәдәй дулый сүз бураны.

Бишек җыры булып тамчы тама,

Курай итә җилләр һәр кураны.

Еллар кайта, битлекләрен салып,

Көзгеләрне сара соры төсләр.

Хәнҗәр хыялында чынга аша

Кызыл шәфәкъ, кара-кучкыл кичләр.

Булмышымда мизгел өне сеңә

Һәр адымга, җырга, кайтавазга.

...Гавам карашыннан качып кына,

Әрем чәчкә ата һәрбер язда.

 

"КУ" 05, 2018

Фото: pixabay

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: