Авылга кайту

Ашыктырып этә иңнәремнән

Туган якка буран.

Өянкеләр авыл башынача

Каршы чыгып торган.

Карт өянке, давылдандыр инде,

Каерылган, сынган.

Күтәрелеп килә алсу кояш, –

Җир йөрәге сыман.

Ал кояшка таба йөзне тотып,

Күпме юллар үттем!

Дөньяда тик безнең авылдадыр

Ипи исле төтен.

Олы хисләр, олы омтылышның

Туган якта башы.

Шушы җирдә туган хыялларым

Шунда чынга ашты.

Туган авыл – соңгы станция...

Кайтам сине уйлап,

Ике рельс кебек ялтыраган

Чана юлы буйлап.

"КУ" 09, 2016

Фото: pixabay