Ашау

Безгә сырхау тамак аша керә,

тәнгә бик күп тәгам килешми.

Нәфес корты зәһәр йоткан мәлдә

күңел кошы укшып гөл исни.

Берәүләргә баллы ярамыйдыр,

икенчеләр сөйми ачыны.

Иблис сыен гына сорап тора

китмәс хәстәлекнең ач җене.

Җанга ятмас ризык канны бозар,

хәрәм азык тартыр языкка.

Мондый чакта ярдәм итеп булмас

дәва күрсәтмәсе язып та.

Нинди генә сырхау килми икән

бары тамак өчен яшәүдән?!

Безнең төп чир куәт ала төсле

татар башын татар ашаудан.

Зиннур Мансуров

"КУ" 2 (февраль), 2017

Фото: pixabay