Син яшердең миннән назлы кочагыңны...

Мин гөл булып юлларыңда чәчәк аттым,

Син назладың минем таҗны җилләр булып.

Давыл купты шулчак минем җаннарымда, –

Син урладың ул давылны җилкән булып.

Мин ут булып кабынганда яңгыр булдың,

Сүндердең дә куйдың минем учагымны.

Ут шарыдай синең җанга атылганда,

Син яшердең миннән назлы кочагыңны...

Тиле яшьлек дулкын-дулкын бәргәләнсә,

Яры булдың минем күңел диңгезенең.

Кыя булып хисләремне тоттың тыеп.

Аңламадым мин ул чакта изгелегең...

Ә мин тиле көттем синнән яшен уты,

Әзер идем бер очкыннан кабынырга.

Әле булса өтә мине күз карашың:

Салдың ялкын... тик ник үзең калдың салкын?..

Фәния Габидуллина

Фәния ГАБИДУЛЛИНА – шагыйрә; «Таң кызы», «Күңелем җимешләре», «Язмышлар ярында» исемле китаплар авторы. М.Гафури исемендәге әдәби премия лауреаты, Башкортстанның атказанган матбугат һәм киңкүләм мәгълүмат хезмәткәре. Уфада яши.

"КУ" 3 (март), 2017

Фото: ok.ru