Сагынам илемне

Сагынам илемне, нечкә билемне,

Яшь вакыт йөзгән зәңгәр күлемне.

Сагынам җәйләрен, матур айларын,

Майлы коймаклы Сабантуйларын.

Сагынам урманын, чишмә буйларын,

Таң аткан чакта кошлар җырлавын.

Сагынам кич-иртә, онытмыйм һич тә,

Чөнки мин сөям, әйтмимен тиккә.

Нигә бу кадәр сөям илемне? –

Җырына күмеп тирбәтте мине.

Үстерде илем батыр ир итеп,

Очырды яуга җитез җил итеп.

Барырмын таптап дошман тупларын,

Куркып чигенмәм зәһәр утларын...

"КУ" 09, 2018

Фото: unsplash