Кино һәм туңдырма

Торабыз басып,

Ишек төбендә.

Кинога кереп

Булмый бүген дә.

Миндә – йөз тәңкә,

Дуста – йөз тәңкә.

Җитми бит тагын

Ике йөз тәңкә.

Тәмле туңдырма

Ялыйсы килә.

Кызык кино да

Карыйсы килә.

– Әйдә, мин карап

Чыгыйм яртысын.

Һәм син карарсың

Калган яртысын!

Шулай ди дустым,

Дустым бик тере.

Эчкә бер кергәч,

Чыкмый ул кире.

– Кирәкми, – дим мин, –

Кибеткә барыйк,

Ике йөз сумга

Туңдырма алыйк!

Юлыбыз бүген

Тагын уңмады.

Кызык киноны

Карап булмады.

Уңа иде ул

Без түзем булсак.

Иртән туңдырма

Алмыйча торсак.

"КУ" 9, 2020

Фото: pixabay