Шигърият

Дүртьюллыклар

Дөреслек Метеордай чабып узды еллар… Таш ватылды. Үлде патшалар. Ә хакыйкать барыбер үлми икән – Арка терәп хәтта атсалар!

Тукай кайтып төшсә…

Әгәр Тукай кайтып төшсә Бүгенге көнебезгә, – Кулын куеп каш өстенә Ни әйтер иде безгә?..

Ризасызлык

Мәйданга козгыннар җыелган. Күргәннәр, арада зәгыйфь бар. Дәшми дә, күрми дә тик торсаң Телеңне, күзеңне чукыйлар!

Исән килеш күмәләр

Падишаһлар фәрман бирә, Яраннары – үтәүдә. И туган тел! Язмышыңны Салдылар үлчәүләргә.

Яфрак өздем

Яфрак өздем. Җил, яңгырдан уңган Көзге яфрак өздем үрелеп. Офык сыман Уттай өрәңгеләр Бара иде инде сүрелеп.